ჩვენი შვეიცარიელი პარტნიორების მხარდაჭერით, სკოლამ 2021 წლის მარტში შვეიცარიიდან 31 ორიგინალ ბრაუნფი და სვის ბრაუნი ჩამოიყვანა.

„სარკინეთის ფერმა“ – არის ახლადაშენებული შენობა, რომელიც აღჭურვილია საწველი დარბაზით, რძის გამაციებელი სისტემითა და ყველა საჭირო ტექნოლოგიით. ეფექტური ტრენინგების უზრუნველსაყოფად, ფერმის შენობაში განთავსებულია საკლასო ოთახი.

სკოლას სარგებლობაში აქვს 100 ჰექტარი სასოფლო-სამეურნეო ნაკვეთები, რომელთაგან ნაწილი საზაფხულო საძოვრებია, ხოლო ნაწილი – სათიბად გამოიყენება. საკვებწარმოების უზრუნველსაყოფად, სკოლას აქვს საკუთარი სასოფლო-სამეურნეო ტექნიკა.

„გომარეთის ფერმა“ – 2022 წელს კოლეჯმა შეიძინა არსებული ფერმერული მეურნეობა მეზობელ სოფელ გომარეთში, რომელიც მთავარი შენობიდან 2 კილომეტრითაა დაშორებული. ქონება მოიცავს სხვადასხვა სასოფლო-სამეურნეო დანიშნულების ნაგებობებს, საერთო ფართობით – 6000 კვ.მ. 2023 წელს გომარეთში 40 სულიანი დამატებითი სასწავლო ფერმა მოეწყო.

საქონელი ზაფხულის თვეებს ბუნებრივ საძოვარზე ატარებს და ზამთრის თვეებში თივით იკვებება. ორივე ფერმის წარმოებული რძე შემდგომი დამუშავებისთვის სკოლის ქარხანას მიეწოდება.

შვეიცარიული აგრარული სკოლა კავკასიის ყველის საწარმოს დღიური წარმადობა 2600 ლიტრია. მრავალფეროვანი აღჭურვილობა სტუდენტებს საშუალებას აძლევს, შეისწავლონ რძის პროდუქტების ფართო ასორტიმენტის წარმოება. ხარისხის კონტროლის მიზნით, საწარმოს აქვს საკუთარი ლაბორატორია. ეფექტური ტრენინგების უზრუნველსაყოფად, საწარმოს შენობაში განთავსებულია საკლასო ოთახი. ქარხანა აღჭურვილია შვეიცარიული კომპანია – “გრობის” მიერ.

ამჟამინდელი ასორტიმენტი მოიცავს:

• მთის დამწიფებული ყველი სხვადასხვა დავარგებით (4-10 თვემდე)
• რაკლეტი
• მყარი ყველი 12 თვიანი დავარგებით
• მუჩლი
• რბილი ყველი თეთრი ობით
• კრემყველი
• იოგურტი
• სასალათე ყველი
• კარაქი

პროდუქცია წარმოდგენილია ადგილობრივ ქსელებში, სპეციალიზირებულ მაღაზიებში, ღვინის მაღაზიებსა და რესტორნებში. ჩვენი სკოლის წარმოებული ყველი ექსპორტირდება ამერიკის შეერთებულ შტატებში.